ايه السبب ؟!!

انا عندى سؤال نفسى فى اجابة ليه احنا ليه بقينا كده ؟
حد لطيف هيقولى كده ازاى يعنى ؟! اقول لك يا سيدى ازاى
الكل دلوقتى بقى مش راضى ومش مبسوط بصراحه حالنا ميسرش
كل يوم بنتخلى عن مبادئنا حاجة ورا حاجة لغاية مقربنا
نفقد الروح اللى كانت بتميزنا عن اى حد تانى والناس فى
الشارع مهمومين اوى ومبقاش فى بركة فى الحاجة وبدأ الانحلال يزيد
والرشاوى تكتر والفساد يعم والشئ الغلط بقى هو اللى بيكسب
ومبقاش عندنا مبدأ وهو ده سبب عدم التوازن اللى موجود
فاحنا عندنا شعاراتنا ومنهجنا اللى بندعى اننا عايشين عليه
بس فى حياتنا بنعمل حاجات تانيه خالص بعيده كل البعد
عن اللى احنا بنقوله وده من الاسباب اللى خلت للاسلام صورة
سيئة قدام الغرب او غير المسلمين عموما فمنين احنا بنقول
ان الاسلام بيامرنا باننا نتقن فى عملنا واننا نتحد وبيامرنا
بالالتزام والصدق وحاجات تانية كتير بس لو جينا طبقناها
على الحاجات اللى بنعملها فى حياتنا هتلاقى اننا بنعمل العكس تماما
والتفسير لده مش ان الاسلام هو اللى غلط لا سمح الله لكن ان احنا اللى مش مسلمين صح زى ماحنا برده مش مصريين صح فمين دلوقتى عنده انتماء لبلده
ومين لو سالناه انت مصرى على راى الاخت نانسى هيرد وهو متفشخر اوى
ورافع راسه ايوة انا مصرى. ده فى كتير اوى بيدارى موضوع الجنسيه لو هم بره البلد وحتى لو فى بلدك وحد سالك السؤال ده فى كتير هيقول (اه للاسف) ده باستثناء طبعا لو كنا لسه كسبانين فى ماتش مهم وديه مصيبة فى حد ذاتها ان مصر بكل تاريخها وحضارتها
ولادها ميفتخروش بيها الا لما (ابو تريكه) يجيب جون
وده لان مصر كان ليها ماضى بس مبقاش ليها حاضر
وده اللى هنحاول ندور له على سبب ....