انا مصرى

انا مصرى . الجملة دى بتفتح مجال للمناقشة والجدال واختلاف الاراء وبتخلينا نعرف طريقة تفكير اللى قدامنا
وازاى هو شايف الدنيا والاوضاع اللى احنا فيها ولو جينا وقسمنا الاراء لمجموعات هنلاقى ان فى مجموعة من الناس بيقولوا
انهم سعداء انهم مصريين وبيكونوا فخورين وهم بيقولوا الجملة دى ورايهم انه حتى لو الظروف دلوقتى صعبة شوية
- يعنى مفيش فرص عمل كتير ومفيش جواز كتير و مفيش تعليم خالص ومفيش خدمات كويسة ومفيش وضع اجتماعى محترم-
لازم برضه ندور على اللى احنا عملناه للبلد وننسى كل البلاوى اللى فيها ومن موقع كل واحد مننا لازم نساعد فى تطور البلد
حتى لو كان الموقع ده فى الغالب كرسى على القهوة عشان نأمن للجيل اللى بعدينا مستقبل احسن وبكده نبقى عملنا حاجة كويسة
وخصوصا ان كل المشاكل اللى فى البلد احنا السبب فيها يعنى المدرس اللى مابيشرحش ده مننا والدكتور اللى مش شايف شغله مننا والعامل اللى مش بيراعى ضميره فى اللى بيعمله برضه مننا .
اما المجموعة التانية بيقولوا انهم مش سعداء ولا حاجة انهم مصريين ولو باديهم يغيروا جنسيتهم ومايبقوش مصريين هيغيروها
ويختاروا اى بلد تانية يعيشوا فيها عيشة محترمة ووجهة نظرهم انهم مالهومش ذنب فى كل اللى هم عايشين فى ده
يعنى ذنبه ايه طفل صغير المدرسة والمناهج والمدرسين كرهوه فى التعليم وفى الدنيا كلها
ولا الشاب اللى بعد ماتخرج اشتغل فى حاجة مالهاش علاقة بدراسته خالص وبعد ماقبل بيها وبقى بيشتغل اليوم كله
وطالع عينه فى الشغل مش عارف يعمل اى حاجة بمرتبه ويلاقى انه بيصرف فى المواصلات فلوس اكتر من اللى بيقبضها
طب ايه بقى اللى هيخلينا نفرح باننا مصريين ونبقى فخورين كمان ؟
وفى مجموعة تالته بيقولوا موضوع انهم مصريين ده امر واقع مش هتفرق لو كانوا فخورين بيه او لأ يعنى حتى لو كانوا زعلانين انهم مصريين مفيش حاجة هتتغير
والمجموعة دى شايفين ان الحل انهم يسافروا برة يشتغلوا ويجيبوا فلوس ويربوا عيالهم فى بلد نضيفة ويعلموهم تعليم محترم ويعيشوا بالطريقة اللى هم عايزينها ويبعدوا عن الازعاج والفساد اللى موجود هنا .
الفكرة مش اننا نختار المجموعة اللى بتعبر عن اللى جوانا لكن المشكلة ان كل الاراء دلوقتى مش شايفة ان البلد فيها حاجة كويسة ممكن تبقى هى البداية لحياة مختلفة
حتى الجمل بتاعت بلدنا احسن من غيرها والبلد اللى نعرفها احسن من البلد اللى مانعرفهاش مبقتش موجوده كلنا دلوقتى حاسين ان مصر مش احسن من غيرها وكتير مستعد يروح بلد مايعرفهاش عشان يبعد عن هنا
وانا كل اللى بتمناه ان الاراء بعد 10 سنين تتغير وتبقى احسن وتكون مصر فعلا احسن بلد

مسألة مبدأ

تصرفات اى انسان بتكون متعلقة بالمجتمع اللى اتربى فيه ومتعلقة بالعادات والتقاليد اللى اتعود عليها ورؤيته للصح والغلط والحلال والحرام بتتكون على حسب البيئة اللى نشأ فيها والدين اللى بينتمى ليه ومن الطبيعى ان اى عقل بشرى قبل ما يتصرف اى تصرف لازم يكون مقتنع بيه وده الفرق بيننا وبين الانسان الالى اللى بيكون مبرمج على تعليمات معينة بينفذها من غير مايفكر فيها وعشان كده احنا كبشر لازم نكون عارفين ده صح ليه وده غلط ليه ونكون مقتنعين باللى بنعمله ونكون بنعمل الصح عشان احنا عايزين نعمله وعارفين اننا بكده بنساعد على تقدم المجتمع اللى احنا عايشين فيه وانه حتى لو الغلط بقى متاح وكل الناس بتعمله احنا مش هنعمله والسبب اللى هيخلينا مانعملش الغلط ان هو ده الصح ولاننا عارفين عواقبه السيئة ولكن اتضح اننا كمجتمع اسلامى , عربى , مصرى بتحكمنا عادات شرقية وتعاليم اسلامية معندناش مبدأ واللى بياكد كلامى للاسف حقائق كثيرة زى مثلا انه من ساعة مالقنوات الفضائية انتشرت وبدانا مع الوقت ننجزب الى العالم الغربى وللاسف بدانا نشوف نتيجة ده فى المجتمع المصرى اللى منقلش من الاجانب الا العادات السيئة فلقينا ان البنات سواء محجبات او غير محجبات بيلبسوا لبس غير محتشم ولقينا ان العلاقة بين البنت والولد بدأت تتطور شوية بشوية لدرجة انهم بيكونوا لسة عيال فى اعدادى وتلاقيهم بيحبوا والجميل اللى فى الموضوع ان الاهالى كمان تفكيرها اتغير وبقت عارفة اللى عيالهم بيعملوه وموافقة عليه والاجمل كمان ان اللى بيرفض بيتقال عليه متخلف ودماغه قديمة معنى كده اننا مكناش محترمين فى لبسنا عشان هو ده الصح ولا احترام الحدود بين البنات والاولاد واصرارنا على منع الاختلاط الشديد كان بسبب اقتناعنا ان هو ده المفروض وان الدين بيأمرنا بكده وعاداتنا الشرقية بتمنع العكس
وبرضه لو اتكلمنا عن اللى حصل السنة دى فى الثناوية العامة والامتحانات اللى كانت بتتباع والناس كلها كانت بتشتريها معنى كده ان الغش لما بقى متاح الكل بقى بيغش وبيشترى الامتحان يعنى احنا مكناش بنغش عشان مكانش بايدينا نغش مش عشان الغش حرام او غلط
انا ساعتها فكرت ياترى لو كان ليه ابن او بنت فى الثناوية العامة ولاقيت الامتحانات بتتباع وانا اقدر اشتريها ياترى هشتريها زى مالناس كلها بتعمل ولا هفضل على مبدأى ؟
ياريت كلنا نفكر فى الموضوع ده وندور على اى حاجة فى حياتنا احنا رافضين نعملها ونحاول نعرف سبب رفضنا الحقيقى للحاجة دى

ممكن

لكل شئ نهاية مهما طالت مدته
ولكل حب يوم هيكون الرحيل سكته
ولكل ذكرى حلوة يوم وهتتنسى
ولكل بسمة , حزن هييجى وتختفى
ولكل يوم جميل بغروب هنودعه
ولكل شوق الم وغدر يضيعه
ولكل حلم سد قادر يمنعه
ولكل جرح يطيب ذكرى ترجعه
ويوم بعد يوم والدنيا ناسيانا
بنقول بكرة هتحلى والفرح يملانا
هنعيش وهنرضى ونحاول نكمل
وكل الدنيا ما تقسى مع بعض نتحمل
اوهام دى ولا ممكن تكون فى يوم حقيقة
احلام ممكن تتحقق ولا امانى جميلة
ممكن ييجى اليوم ونخلى الفرح يدوم
ممكن نعيش بقى من غير هموم

هكذا خلقنا الله

كل منا انسان قابل للتحسين

فنحن كبشر خلقنا لنعمر ونبنى

بفطرتنا نسعى وراء السلام ونتعامل به

بطبيعتنا نحب ونفرح ونحزن ونخاف

نبحث دائما عن اجمل مافينا لنظهره

نبحث عن ما يجعلنا سعداء لنفعله

نبحث عن ما يقربنا ممن نحب لنقترب منه

فالانسان بطبعه اجتماعى

لا يحب ان يعيش فى عزلة

هذه طبيعة كل منا وهكذا خلقنا الله

لكنى لاارى هذه الطبيعة البشرية تنطبق علينا الان

ارى الجميع يسعى وراء الحرب والخراب

ارى ان السلام اصبح وسيلة الضعيف

ارى اننا لانستخدم عقولنا للتفكير

ارى التسرع فى جميع القرارات المتخذة

بالرغم من انها احيانا تتحكم فى مصير شعوب كاملة

لا ارى للحكيم بيننا اى مجال

لا ارى السعادة تغمر اى وجه

لا ارى الحب يملأ اى قلب

لا ارى اى فعل نفعله يصلح لكى ينسب الى كلمة الانسانية

لا ارى اى شئ يجعلنى اصدق اننا بشر حقيقيين

ولكنى لا ارى ايضا اى نفس مرتاحة

ولا ارى ضميرا صافيا

ولا ارى عينا تنام فى طمأنينة

لان كل مانفعله فى حياتنا متعارض كليا مع طبيعتنا نحن كبشر

فالكره والحقد والانانية والعنف مظاهر لاتتوافق مع فطرتنا النقية الصافية

ولا اصدق اننا خلقنا لغرض ففعلنا عكسه

وبالرغم من عدم تكيفنا معه فكلنا مصرون على ان نظل كما نحن

ولكن هل تتفقون معى فيما اقول ؟

هل ترون ما أرى ؟ هل تعيشون ما اعيش من أسى وندم ؟

هل تجدون للحياة معنى هكذا ؟

عندما كنت افكر فى هذا الموضوع اعجبتنى فكرة

ليه منبقاش احسن ؟

دايما فى امل للتغيير ودايما فى فرصة للتعمير

ودايما فى وقت علشان نفكر

بقينا كده ليه

وهنعمل ايه عشان نبقى احسن ؟

اعتزار رسمى

اعلن انا سمسة من موقعى هذا ( فى بيتنا ) ومن منصبى هذا كصاحبة مدونة اشكى لمين الفاضله
اننى اقدم اعتزار رسمى لكل اصدقاء المدونة لانى سوف اضطر عن التوقف عن كتابة اى موضوع لفترة بسبب انشغالى الشديد فى امتحاناتى واطلب منكم الدعاء
والله هتوحشونى اوى وربنا يصبرنى على فراقكم
بس ماتخافوش راجعالكم تاانى
واخيرا بشكر كل اللى سأل عنى
والسلام عليكم ورحمة الله وبركاته

هى فوضى

كلنا عارفين ان الشعب المصرى شعب جميل بس عليه شوية حاجات غريبة اوى
زى ان بقى كل واحد فاكر انه بيمتلك البلد ديه وانه عايش فيها لواحده
يعنى لما يبقى وجود اى قهوة فى شارع معناه ان الرصيف اللى هو المكان المخصص عشان الناس تمشى فيه اتلغى لوجود كراسى حلت محل الناس وطبعا صاحب القهوة لو حد كلمه هيقول ان شوارع ربنا واسعة ولا انتوا ماتجوش غير على رزق الغلابة و يعنى هو مفيش غير القهوة ديه و كلام زى ده ..
بس احنا ليه اساسا نتكلم مع صاحب القهوة احنا مالنا وماله
طيب السؤال اللى المفروض يتسال احنا المفروض نكلم مين ؟
ومين المسئول عن التعدى اللى حاصل لحقوق الناس اللى كراسى القهاوى بقت ناهبة حقها؟
انا عن نفسى معرفش ......
اما شوادر العزاء اللى بتوقف حركة شارع كامل مش الرصيف بس واللى بيبقى فيها سماعات تخلى كل سكان العمارات اللى فى الشارع بيحسدوا الراجل اللى مات على الهدوء اللى هو فيه يعنى مفيش حد عنده دم يقول ان يمكن يبقى فى حد بيذاكر عشان امتحاناته او حد تعبان مش قادر ينام من الازعاج او حد عنده شغل بدرى لازم ينام كويس عشان يبقى فايق للى بيعمله بس هم هيفكروا فى كل ده ليه ما كل الشوادر بتبقى كده ومفيش حد بيكلمهم
طيب لما يحصل كده لحد المفروض اننا نكلم مين ؟ واللى هنكلمه ده المفروض يعمل ايه ؟
برده انا مش عارفة .....
واللى بيحصل فى العزاء بيحصل فى الافراح نفس الشادر اللى موقف الدنيا ونفس السماعات اللى خارمة ودان الناس ونفس الجهل اللى موجود وبرده نفس السؤال هو مين اللى مسئول عن ده ؟
ده حتى فى عفش العرايس اللى بيبقى موقف الشارع اكتر من الفرح نفسه ومفيش اى حد بيراعى ان ممكن يبقى فى حد مستعجل عنده ظروف معينة او مسافر وممكن يتاخر او حد مصاب عايزين ينقلوه المستشفى ده حتى لما بتبقى عربية اسعاف معدية محدش بيفكر انه يعديها بصراحة شعب ذوق ذوق ذوق يعنى من الاخر الشارع ده بقة اى حد بسهولة ممكن يوقفه ده لو فى خناقة ممكن تقلب الدنيا ده لو فى حد ماسك مطوة الشارع مايمشيش حتى الشعور بالامان مبقاش موجود
مين المسئول عن كل ده ؟ مين اللى خلانا شعب مش عارف يطالب بحقه فى ابسط المشكلات؟
بجد انا مش عارفة بس اللى اعرفه ان ده جهل واللى اعرفه ان مفيش حد بيتقدم وكل مظاهر التخلف ديه موجوده واللى اعرفه انى لو كنت غريبة عن البلد ديه كنت هسأل هو مين المسئول اللى سايب الدنيا بايظة كده وايه الشعب اللى مفيش حد فيه بيراعى حق حد
على فكرة كل الحاجات ديه فى قوانين بتمنعها بس مين اللى المفروض ينفذ القوانين ديه على كل الناس حتى لو كان اللى بيخالف القانون ده معاه واسطة
ياريت حد يقولى

عماد الدين

انا المرة ديه هطرح مشكلة بتمر بالمسلمين وهى الصلاة اول مايسال عنه العبد فى قبره
انا عارفة ان الحمد لله فى كتير من المسلمين بيصلوا وعارفين ربنا بس برده فى شباب كتير مبيصليش للاسف وديه مصيبة كبيرة لان بكده يبقى احنا نسينا السبب اللى ربنا خلقنا عشانه
ربنا خلق الانسان عشان يعبده ويعمر الارض واساس العبادة هى الصلاة وبالصلاة هنعمر الارض وهنبقى احسن وطبعا كلنا عارفين حكاية ( كونداليزا رايس ) اللى بتقول ان المسلمين مش هينتصروا على اليهود الا اذا بقة عدد المسلمين اللى بيصلوا الفجر فى المسجد قد عدد المسلمين اللى بيصلوا الجمعة. وسواء كانت الحكاية ديه حقيقية أو لأ بس المضمون بتاعها صح فعلا احنا كمسلمين لو بقينا قريبين من ربنا كده اكيد حاجات كتير هتتصلح فينا وساعتها ربنا هينصرنا وهنبقى اقوى بديننا
ولو اتكلمنا مع اى حد مش بيصلى وسمعنا مبرراته هنلاقى انه بيقول انه بينسى وان اليوم بيعدى بسرعة وانه مش بيحس بالوقت وانه بيبقى مشغول بحاجات كتير
بس لو كل واحد وقف مع نفسه وقال خلاص انا هصلى و يخلى الصلاة تبقى هدف كبير وطريق يرضى بيه ربنا ونخلى عندنا عزيمة و ندى الاولوية للصلاة عن اى حاجة تانية صدقونى هنتغير وهنصلى
وعلشان الموضوع مايبقاش كلام وخلاص ويبقى بفايدة انا بطلب من كل اللى قرأ الموضوع
انه يقول حل لمشكلة الصلاة او يكتب اقتراح لاى حد مش عارف يواظب علي الصلاة
يمكن نبقة بكدة عملنا حاجة مفيدة