هى فوضى

كلنا عارفين ان الشعب المصرى شعب جميل بس عليه شوية حاجات غريبة اوى
زى ان بقى كل واحد فاكر انه بيمتلك البلد ديه وانه عايش فيها لواحده
يعنى لما يبقى وجود اى قهوة فى شارع معناه ان الرصيف اللى هو المكان المخصص عشان الناس تمشى فيه اتلغى لوجود كراسى حلت محل الناس وطبعا صاحب القهوة لو حد كلمه هيقول ان شوارع ربنا واسعة ولا انتوا ماتجوش غير على رزق الغلابة و يعنى هو مفيش غير القهوة ديه و كلام زى ده ..
بس احنا ليه اساسا نتكلم مع صاحب القهوة احنا مالنا وماله
طيب السؤال اللى المفروض يتسال احنا المفروض نكلم مين ؟
ومين المسئول عن التعدى اللى حاصل لحقوق الناس اللى كراسى القهاوى بقت ناهبة حقها؟
انا عن نفسى معرفش ......
اما شوادر العزاء اللى بتوقف حركة شارع كامل مش الرصيف بس واللى بيبقى فيها سماعات تخلى كل سكان العمارات اللى فى الشارع بيحسدوا الراجل اللى مات على الهدوء اللى هو فيه يعنى مفيش حد عنده دم يقول ان يمكن يبقى فى حد بيذاكر عشان امتحاناته او حد تعبان مش قادر ينام من الازعاج او حد عنده شغل بدرى لازم ينام كويس عشان يبقى فايق للى بيعمله بس هم هيفكروا فى كل ده ليه ما كل الشوادر بتبقى كده ومفيش حد بيكلمهم
طيب لما يحصل كده لحد المفروض اننا نكلم مين ؟ واللى هنكلمه ده المفروض يعمل ايه ؟
برده انا مش عارفة .....
واللى بيحصل فى العزاء بيحصل فى الافراح نفس الشادر اللى موقف الدنيا ونفس السماعات اللى خارمة ودان الناس ونفس الجهل اللى موجود وبرده نفس السؤال هو مين اللى مسئول عن ده ؟
ده حتى فى عفش العرايس اللى بيبقى موقف الشارع اكتر من الفرح نفسه ومفيش اى حد بيراعى ان ممكن يبقى فى حد مستعجل عنده ظروف معينة او مسافر وممكن يتاخر او حد مصاب عايزين ينقلوه المستشفى ده حتى لما بتبقى عربية اسعاف معدية محدش بيفكر انه يعديها بصراحة شعب ذوق ذوق ذوق يعنى من الاخر الشارع ده بقة اى حد بسهولة ممكن يوقفه ده لو فى خناقة ممكن تقلب الدنيا ده لو فى حد ماسك مطوة الشارع مايمشيش حتى الشعور بالامان مبقاش موجود
مين المسئول عن كل ده ؟ مين اللى خلانا شعب مش عارف يطالب بحقه فى ابسط المشكلات؟
بجد انا مش عارفة بس اللى اعرفه ان ده جهل واللى اعرفه ان مفيش حد بيتقدم وكل مظاهر التخلف ديه موجوده واللى اعرفه انى لو كنت غريبة عن البلد ديه كنت هسأل هو مين المسئول اللى سايب الدنيا بايظة كده وايه الشعب اللى مفيش حد فيه بيراعى حق حد
على فكرة كل الحاجات ديه فى قوانين بتمنعها بس مين اللى المفروض ينفذ القوانين ديه على كل الناس حتى لو كان اللى بيخالف القانون ده معاه واسطة
ياريت حد يقولى

عماد الدين

انا المرة ديه هطرح مشكلة بتمر بالمسلمين وهى الصلاة اول مايسال عنه العبد فى قبره
انا عارفة ان الحمد لله فى كتير من المسلمين بيصلوا وعارفين ربنا بس برده فى شباب كتير مبيصليش للاسف وديه مصيبة كبيرة لان بكده يبقى احنا نسينا السبب اللى ربنا خلقنا عشانه
ربنا خلق الانسان عشان يعبده ويعمر الارض واساس العبادة هى الصلاة وبالصلاة هنعمر الارض وهنبقى احسن وطبعا كلنا عارفين حكاية ( كونداليزا رايس ) اللى بتقول ان المسلمين مش هينتصروا على اليهود الا اذا بقة عدد المسلمين اللى بيصلوا الفجر فى المسجد قد عدد المسلمين اللى بيصلوا الجمعة. وسواء كانت الحكاية ديه حقيقية أو لأ بس المضمون بتاعها صح فعلا احنا كمسلمين لو بقينا قريبين من ربنا كده اكيد حاجات كتير هتتصلح فينا وساعتها ربنا هينصرنا وهنبقى اقوى بديننا
ولو اتكلمنا مع اى حد مش بيصلى وسمعنا مبرراته هنلاقى انه بيقول انه بينسى وان اليوم بيعدى بسرعة وانه مش بيحس بالوقت وانه بيبقى مشغول بحاجات كتير
بس لو كل واحد وقف مع نفسه وقال خلاص انا هصلى و يخلى الصلاة تبقى هدف كبير وطريق يرضى بيه ربنا ونخلى عندنا عزيمة و ندى الاولوية للصلاة عن اى حاجة تانية صدقونى هنتغير وهنصلى
وعلشان الموضوع مايبقاش كلام وخلاص ويبقى بفايدة انا بطلب من كل اللى قرأ الموضوع
انه يقول حل لمشكلة الصلاة او يكتب اقتراح لاى حد مش عارف يواظب علي الصلاة
يمكن نبقة بكدة عملنا حاجة مفيدة