تصرفات اى انسان بتكون متعلقة بالمجتمع اللى اتربى فيه ومتعلقة بالعادات والتقاليد اللى اتعود عليها ورؤيته للصح والغلط والحلال والحرام بتتكون على حسب البيئة اللى نشأ فيها والدين اللى بينتمى ليه ومن الطبيعى ان اى عقل بشرى قبل ما يتصرف اى تصرف لازم يكون مقتنع بيه وده الفرق بيننا وبين الانسان الالى اللى بيكون مبرمج على تعليمات معينة بينفذها من غير مايفكر فيها وعشان كده احنا كبشر لازم نكون عارفين ده صح ليه وده غلط ليه ونكون مقتنعين باللى بنعمله ونكون بنعمل الصح عشان احنا عايزين نعمله وعارفين اننا بكده بنساعد على تقدم المجتمع اللى احنا عايشين فيه وانه حتى لو الغلط بقى متاح وكل الناس بتعمله احنا مش هنعمله والسبب اللى هيخلينا مانعملش الغلط ان هو ده الصح ولاننا عارفين عواقبه السيئة ولكن اتضح اننا كمجتمع اسلامى , عربى , مصرى بتحكمنا عادات شرقية وتعاليم اسلامية معندناش مبدأ واللى بياكد كلامى للاسف حقائق كثيرة زى مثلا انه من ساعة مالقنوات الفضائية انتشرت وبدانا مع الوقت ننجزب الى العالم الغربى وللاسف بدانا نشوف نتيجة ده فى المجتمع المصرى اللى منقلش من الاجانب الا العادات السيئة فلقينا ان البنات سواء محجبات او غير محجبات بيلبسوا لبس غير محتشم ولقينا ان العلاقة بين البنت والولد بدأت تتطور شوية بشوية لدرجة انهم بيكونوا لسة عيال فى اعدادى وتلاقيهم بيحبوا والجميل اللى فى الموضوع ان الاهالى كمان تفكيرها اتغير وبقت عارفة اللى عيالهم بيعملوه وموافقة عليه والاجمل كمان ان اللى بيرفض بيتقال عليه متخلف ودماغه قديمة معنى كده اننا مكناش محترمين فى لبسنا عشان هو ده الصح ولا احترام الحدود بين البنات والاولاد واصرارنا على منع الاختلاط الشديد كان بسبب اقتناعنا ان هو ده المفروض وان الدين بيأمرنا بكده وعاداتنا الشرقية بتمنع العكس
وبرضه لو اتكلمنا عن اللى حصل السنة دى فى الثناوية العامة والامتحانات اللى كانت بتتباع والناس كلها كانت بتشتريها معنى كده ان الغش لما بقى متاح الكل بقى بيغش وبيشترى الامتحان يعنى احنا مكناش بنغش عشان مكانش بايدينا نغش مش عشان الغش حرام او غلط
انا ساعتها فكرت ياترى لو كان ليه ابن او بنت فى الثناوية العامة ولاقيت الامتحانات بتتباع وانا اقدر اشتريها ياترى هشتريها زى مالناس كلها بتعمل ولا هفضل على مبدأى ؟
ياريت كلنا نفكر فى الموضوع ده وندور على اى حاجة فى حياتنا احنا رافضين نعملها ونحاول نعرف سبب رفضنا الحقيقى للحاجة دى
21/07/2008
مسألة مبدأ
الاشتراك في:
تعليقات الرسالة (Atom)
هناك 52 تعليقًا:
أنا طبعا مش ضد التقاليد المصريه على العكس في كتير منها أخلاقي يتناسب مع طبيعتنا لكن بالنسبه للملبس فربما يكون ماهو حشمه من وجهة نظرك هو غير حشمه من وجهة نظر غيرك لهذا لايمكن الحكم على أخلاق أي أنسان من خلال ملبسه إلا إذا كانت فاضحه بشكل مستفز طبعا على أي حال أنا أحب كل ماهو وسطي لا للتزمت وفي نفس الوقت لا للأبتذال
بوست جميل تحياتي
بوست جميل بجد يا سمسمه
فعلا معدش فيه مبدأاللى عنده مبدأ
سواء الغلط بقى متاح مش متاح لازم ينصاع لمبدأه تحت اى ظرف
بس للاسف محدش بقى عنده مبدأ
احييكى عالبوست الهايل
واتمنالك التوفيق
سمسه
انا اول مره ازور مدونتك
مدونه جميله واكتر حاجه عجبتنى
الصور والتصميم
موضوع البوست جيد فعلا
تحياتى
بجد الموضوع ده حيرنى كتير وكتبت عنه ومحدش فهم حاجه ؟
للاسف
موضوع هايليا سمسمه
البوست بتاعك عجبني اوي تسلم افكارك
وسؤالك في الاخر فكرت فيه والاجابة اني مش هشتري الامتحان طبعا
وهفهم ابني او بنتي ليه مش هشتريله الامتحان
واول سبب لازم يؤمنوا بيه انه الغش حرام وتاني سبب انه علشان يفرح بنجاحه لازم يكون بمجهوده
الموضوع بيرجع لقوة الايمان اللي ايمانه قوي هيتغلب على اي مغريات
تحياتي لك
السلام عليكم
شوفى يا اختى الغالية
انا بصراحة زمن غير اشتغالات
هشترى الامتحان
سلالالالالالالالالالالالالالالالالالالالالالالالام
هشتريها
وش زعلان
دى مدونة جديدة عايزك تدينى رايك
فى فكرتها
egypt eyes
اشكرك على مشاركتك الجميلة
ده اول تعليق ليك معانا
يارب دايما تنورنا
تحياتـى
بنت مصرية
كلامك مظبوط
دايما منورانى ياقمر
اشكرك على مشاركتك
تحياتى
snohe
اشكرك على كلامك الجميل
ويارب مايكونش مجاملة
وماتكونش دى اخر زيارة
تحياتى
صوت من مصر
اشكرك على كلامك وعلى مشاركتك الدائمة
تحياتى
hte queen
اول مشاركة ليكى
نورتينــــــا
اشكرك على كلامك الجميل
تحياتى
وخلينا نشوفك دايما
حدوتــة
انا مقدرش اعارضك فى رأيك ده
انا عن نفسى لما بفكر فى الموضوع بقول انى مش هشتريه
بس اكيد انت ليك وجهة نظر فى رأيك
تحياتى
واشكرك على مرورك
الرسائل الرومانسية
فى الاول مبروك على المدونة الجديدة
هدخل دلوقتى واشوفها
وبالنسبة لموضوع الامتحان انت حر فى رأيك طبعا
تحياتى
وبالتوفيق
سمسمه
اولا موضوعك هام جدا
وللاسف سببه فقد القدوة
احيانا او كثير من الاخيان بعد الامتحان يسأل ولى الامر ابنه سؤال
تعرفى ايه هو السؤال غششوكم ولا لأ؟
اكيد نعلم اولادنا الغش فأى مبادئ تلك التى سيتمسكوا بها
مدونتك رائعة
وسعيد باتلتواصل
ودمتى بو
فعلا والله معاكى حق
مين لسه واقف على مبدأه مهما كان ومعندوش نيه يغيره مهما حصل
قليلين اوى
بونجورنو سينيوريتا
بالنسبه للتقليد اللى احنا بنعمله وواخدينه من الغرب احنا ياريتنا نقلدهم فى العلم كده مع العلم ان احنا عقولنا انضف منهم بمراحل واذكى منهم بكتير لكى ان تتخيى ان اللى واضع نظام عشان المانيا تنور واحد مصرى ده حاجه وغيره كتير لكن احنا مش بناخد الا الوحش ونقلده زى ما تقولى كده بنفرح فرحه الاهبل لما تنزل موضه جديده من اوروبا
واما الثانويه مين فى مصر كلها مش هيلاقى الامتحان بيتسرب ومش هياخده لا واللىيغيظك انه ما يكفيهوش الامتحان ده بيبقى زى البجح وعايز كمان الاجابه مش كفايه ده
هنقول ايه الغش بقى فى البلد كلها مش ثانويه بس هقولك ايه ولا ايه يا سمسم
البوست جميل
خالص تحياتى
الباش مهندس بوحميد
بوصى انا معاكى ان فى ناس كتير دلوقتى بت بتعمل الغلط لانه بقى موجود فى كل مكان لو انه ده طبعا مش مبرر انه يتعمل
بس بحس ان فى حجات أساسيات ثوابت يعنى مهما حصل مش هقدر اعمل عكسها(يعنى مقدرش بجد ارمى زباله فى الشارع لان كل البشر بترمى زباله دا مثال بسيط)
بس فى حكايه الامتحانات دى مقدرش اقول لانى مش اتحطيت فى الموقف دا قبل كدا
بس اما كنت فى امتحانات الثانوى مكنتش بغش حتى لو كانت اللجنه سايبه ودا احتمال لانى تعبت وذاكرت فمش عايزة حتى درجه تتنسب او احس ان حد شاركنى فيها
ممكن مشتريش الامتحان
طارق الغنام
اسعدنى وجودك معانا لاول مرة
ويارب ماتكونش الاخيرة
واشكرك على كلامك الجميل
معاك حق فى اللى بتقوله
مبقاش فى مبدأ
تحياتى
موناليزا
اتفق معاكى فى كلامك وده للاسف طبعا
هنفضل لحد امتى مش مقتنعين باللى بنعمله عشان كده ممكن نغيره فى اى وقت
تحياتى
mregypt7
يعنى هى جت على الاجابات يا باشمهندس
طالاما المبدأ اتلغى يبقى خلاص توقع كل يوم المزيد من الكوارث
تحياتى
اشكرك على المشاركة
lonlysmily
فى الاول كل سنة والمدونة بخير
انا شايفة ان الصح طبعا اننا مانشتريش الامتحان
تحياتى
انا عشان عندى مبدا و عارفة ان الغش حرام و ان ده حاجة غلط فانا مش هشترى الامتحان بس فى الزمن ده و الصعوبات الى بتواجهنا و تحت الضغوت الى بنمر بها مش عارفة هفضل على مبدئى و لا هغير رأى .
بجد الموضوع حلو اوى
تحياتى
طبعا عندك حق ان فى قيم كتيرة بنتشدق بيها وعند اول فرصة بنضحى بيها والمصلحة تحكم،
للاسف لان الفهم الصحيح لتلك القيم غير موجود،
كما ان التحلى بيها ليس لانها قيمة بل لانها عادة، فاذا ما تغيرت العادة لم يصبح للتمسك بها معنى بخلاف القيمة طبعا،
عموما موضوعك جميل ويحمل معنى محترم عميق احييكى على الاختيار،
وفعلا كلنا محتاجين نعيد حساباتنا مع نسنا وندور على الصح والغلط،
تحياتى لك.
احنا في مرحلة انهيار للمباديء يا سمسمة , او ما تبقي منها
اللي فعلا بلاحظه ان اللي بيعمل حاجة او مش بيعملها مش بسبب ان دا مبدأه لا لان الناس بتعمل كدة فهو كمان بيعمل كدة
لكن انا باحس فعلا ان لما بيكون عندك مبدأ وبتطبقه في حياتك في كل موقف بتمر بيه دا بيريحك كتير لانك بتبقي عارف انت بتعمل ايه ورايح فين
انا فاكرة اني قريت الموضوع دا قبل كدة ورديت كمان عليه , بس هو النت عندي كان بايظ فيمكن يكون التعليق ما وصلش
المهم ان الموضوع كان عجبني جدا لما قريته لانها مش مجرد مسألة مبدأ قد ما هي مسألة حياة كاملة
اول زيارة لى فى المدونة
ماشاء الله على المدونة رائعة فى الشكل والمضمون
والبوست اكثر من رائع
باذن الله لن تكون الزيارة الاخيرة
تقبلوا تحياتى
http://a7lam-el7aya.blogspot.com/
BOSY
فى الاول احب اشكرك على المشاركة
انا عارفة ان الاختيار صعب
لكن اتمنى ان كلنا نثبت على موقفنا ومحدش يضعف ويشتريه
تحياتى يا قمر
رؤية
اول مشاركة ليكى معانا
بجد نورتينا
احب اشكرك على كلامك الجميل
كلامك مظبوط فعلا احنا بطلنا نفكر احنا بنعمل ده ليه والنتيجة اننا ممكن فى اى وقت نغير اللى بنعمله ده عشان احنا معندناش سبب يخلينا نتمسك بيه
تحياتى
ويارب دايما تنورينا
سنووايت
السبب اننا بطلنا نفكر فى اللى احنا بنعمله
احنا عايشين وخلاص مش مهم اى حاجة تانية
لازم فعلا نعيد حساباتنا
تحياتى
واشكرك على مشاركتك الدائمة
واحد ميت
حقيقى زيارتك شرف ليه
اشكرك على كلامك الجميل
واتمنى دايما تشاركنا رأيك
تحياتى
أولا عايزة أشكرك علي زيارتك مدونتي و يا رب نبقي متواصلين مع بعض علي طول
عارفة يا سمسمة دستي علي الجرح
أنا عايشة فأوروبا و شايفة إزي شباب مسلم إنتزعوا مبادئ العوبة و إرتدوا قناعا لن يكون لهم أصل فيه بل أحيانا كثيرة تدمع عيني و أقول وااااا أسفاه ضاع شباب المستقبل
لا أدري ما أقول و لكن أساس المبدأ يكمن في قوة شخصيتنا فإذا كنا ضعاف الشخصية فستتسلل إلي قلوبنا أفكار و عادات نستبدلها بأصلنا
شكرا لك ثانية
تحياتي
رغدة حزن
عندك حق ياسمسمة
خسارة ان احنا ماعندناش اقتناع بالمبادىء اللى نقولها او حتى بنسعى ان احنا يكون لينا مبدأ ونلتزم بيه
ماشيين مع الدنيا ومع التغيير وماينفعش تقفى فى مكانك الدنيا بتتغير وانت كمان لازم تتغيرى حتى لو كان التغير ده غلط وحتى لو كان ضد دينك وعقيدتك.. اغلب الناس تايهة ومافيش مبادىء او اسس بتمشى عليها
على فكرة انا استحالة اشترى الامتحان لانى مستحيل احرم اولادى من فرحة نجاحهم بمجهودهم..بجد فرحةمش ناس كتير عرفاها دلوقتى
مدونتك اكتر من رائعة وعاجبنى اوى التصميم بتاعها
سورى على الرغى الكتير اللى فوق
سلام ياسمسة
جميل اوى الموضوع ده ازاى مجتش من زمان معلش تتعوض المهم كلام جامد اوى بس الحقيقه وعشان نكون موضوعين هى مبدأنا لازم نستقيها منين ؟ هو ده السؤال الازم ينطرحمن الدين ومن قيم المجتمع لانو مش بس الدين البيحكمنا لا ده مجتمع بيقبل حجات وبيرفض حجات واحنا لابقه بفرق معانا دين ولا مجتمع الا من رحم ربي
عمومابجد بوست جامد
تحياتى
رحيق الحياة
انشاء الله نبقى دايما متواصلين ده شئ يسعدنى
معاكى حق فى اللى بتقوليه
قوة الشخصية والايمان باللى احنا بنعمله هو ده اللى هيخلينا على مبدانا
تحياتى
totaaaa
احييكى على موقفك من شراء الامتحان
وياريت اناس كلها تقتنع باللى انتى بتقوليه
فعلا الناس تايهة
اشكرك على كلامك الجميل
تحياتى ياقمر
ماء تشرين
انا كده هتغر بجد
بجد انا بشكرك على كلامك الجميل ده
بس للاسف اللى عارفين هم عايزين ايه وبيعملوه قليلين اوى
تحياتى يا جميل
سيدتى المبادىء لا تتجزا
ولكن فى زمن المهانه والتنطع والغباء
تتغير المفاهيم
فالشجاعه تصبح تهور
والكرم يصبح سفه
والطيبه تصبح عبط
والحلم يصبح جبن
والاخلاص يصبح عبوديه
والنبل يصبح تمثيل
والتحشم يصبح تخلف
والرعى يصبح موضه
والزنا يصبح حب
سيدتى كلماتك تمس اوتار القلوب وتدمى الفؤاد
انتى حد جميل وحساس جدا
تسلم ايدك
تحياتى
momken
على فكرة كده كتير عليه
بجد انا بشكرك على ذوقك
واتمنى يكون الموضوع عجبك فعلا
تحياتى
واشكرك على تواصلك الدائم
كلام معقول جدا ...
بصي فيه حديث بيقول "لا يكن أحدكم إمعة ، إن أحسن الناس أحسن وإن أساءو أساء "
مش متذكر البقية بس المقصود ان الواحد يتصرف كما يملي عليه ضميره بصرف النظر عن تصرف الآخرين ، يعني مش عشان كل الناس بتسرق مثلا يبقى أنا كمان أسرق ، وهكذا ...
لكن ساعات الواحد بيضعف ، ولما يشوف الناس كلها حواليه بتسلك طرق غير مشروعة بيحاول يبرر لنفسه أنه يعمل زيهم ...
عارفة ... جميل جدا ان الواحد يكون له مبدأ حتى ولو كان غلط ...
لي عودة إن شاء الله ...
والسـ ختام ــلام
mohamed hesham
اللى بتقوله ده هو اللى بيحصل كل واحد بيتصرف زى مالناس بتعمل
مفيش مبدا واحد فى حياتهم مقتنعين بيه
تحياتى
واشكرك على المشاركة
يا مفتريه..........
لا بجد مفتريه
كل دى مواضيع
والله بجد بحييكى
وانا بجد........ بفكر كتير لما مثلاا اقول رايى فى موضوع معين... انا ليه قولت الراى دا ومقولتش الراى دا, وليه الراى المخالف مخالف ليه, وليه ما اغيرش رايى.
انا بعمل كدا.
وبحيييييييييييييكى والله لانك هتخلينى اعمل كدا علطول
انا كنت فاكره نفسى كدا هبله
تحياتى
دى اول زياره ان شاء الله مش هاتكون الاخيره وده فعلا موضوع مميز وبحييك عليه
وفي موضوع الملابس فهى فعلا بتحكم علي اخلاق الناس لانها بتعكس فكرته عن الصح والغلط
قياسا علي المنطق العام المقبول مش منطق شخص معين
وعن الامتحان:طبعاهاكافح علشان مشتريهاش ومأدرش انكر ان ده هايكون كفاح مرير لان احنا لازم نضحى علشان مبادئنا"مابنى علي باطل فهو باطل"
وتقبلي تحياتى
تحياتي
طالت الغيبة عنا...يارب تكوني بخير و سلام...
لو سمحتي طمنينا عليك.
تحياتي و تقديري
حنين
انا اللى بشكرك على زيارتك الجميله دى
ويارب ماتكونش اخر مرة
السبب اللى خلاكى مستغربة انك بتعملى كده هو ان مفيش حد بقى بيسال نفسه انا ليه بعمل كده ومبعملش كه مع ان هو ده الصح
تحياتى يا قمر
Nabil
ربنا معاك و يقدرك على الكفاح العظيم اللى انت هتعمله
بجد لازم عشان نمشى حياتنا بالطريقة اللى احنا عايزينها لازم نتعب شوية لاننا هنواجه صعوبات كتيير
تحياتى
واشكرك على مرورك
الربان
انا بخير الحمد لله
اشكرك على سؤالك
انا بعتذر عن تاخيرى فعلا لكن بجد انا مش عايزة اكتب حاجة خالص عندى حالة من عدم التفاؤل واليأس الشديد لو كتبت اى حاجة دلوقتى ممكن اتسبب فى حدوث اكتئاب لكل اللى هيقرأ الموضوع
تحياتى
و اشكرك مرة تانية
اسمحيلى اضيف لينك مدونتك الرائعه في فوح الياسمين
تحياتى
Nabil
ده شئ يسعدنى ويشرفنى بجد
ورايك فى المدونة اسعدنى جدا
تحياتى
طبعا المشكلة الرئيسية انت وضعتي ايدك عليها وهي التعليم لاسف ما بقاش هناك مدرس وتلميذ ، المدرس مشغول بالدروس الخصوصية والتلميذ اصبح مشغول بمشاهدة ميلودي افلام واربيان ، والاهل مشغولين بطابور العيش! سمسمه مدونتك صادقة ونابعة من القلب اتمنى لك كل خير
بصى لو هنتكلم على المبدا بشكل عام
فكله بيتغير دلوقت و فعلا نسبه كبيرة جدا معدتش عندها مبدا نظرا لتغير الظروف و النفوس كمان
اما موضوع الملبس
وجهات نظر و كل واحد حر
" مع العلم ان حريتك بتقف عند حدود الاخرين"
تحياتى
dalia
اشكرك يا قمر على الكلام الجميل ده
وانتى بجد منورانى
ده اول تعليق ليكى وياريت مايكونش الاخير
تحياتى
Rania
اول مشاركة معانا يارب نشوفك علطول وماتكونش دى اخر مرة
نورتينا يا جميل
تحياتى
إرسال تعليق