فى يوم كنت قاعدة بفكر فى موضوع شاغلنى يا ترى يا هل ترى ايه اللى خلى بلاد كتيرمن
الغرب متقدمة اوى دلوقت مع ان مبقالهاش كام سنة يعنى معندهاش حضارة عريقة ولا حتى عندها موارد كتيرة تقدر تستفيد منها على عكس مصر اللى فيها مقومات كتيرة ممكن تخليها رائدة فى كتير من المجالات وبصراحة لاقيت حاجات كتير بس لاقيت ان كلها تقريبا متعلقة بطريقة التعليم هناك
يعنى مثلا الجيل اللى طالع فاهم الحياة وعارف يلاقى نفسه فى الشغلانة اللى بيشتغلها وبيحبها لانه عارف ايه قدراته وايه ميوله من الاول وعا رف انه لازم يشتغل بجد علشان يدى بلده ويدى نفسه ويخدم الجيل اللى بعده اكيد ده نتيجة تعليم صح وتوجيه سليم وعناية اكتر
و ثقافة ان المهنة الشريفه مهما كانت فهى بترفع شان صاحبها وده طبعا كافى على انه يساعد فى تقدم البلد اللى فيها ناس بتفكر كده وقيس على كده بقة كل الحاجات اللى ساعدت فى تطور البلاد ديه وفكر فيها هتلاقى
ان كلها هتوصلك ان السبب هو تعليم صح ووجود وعى كبير وثقافة عاليه وتعالى بقى شوف المدارس و
الجامعات فى مصراللى بتخرج جيل مش فاهم اى حاجة هتعرف بجد احنا ليه مش متقدمين ولا عمرنا هنتقدم وبص شويه على المناهج التعليميه عندنا وشوف الشباب الخريجين بيفكروا ازاى وايه هدفهم اللى عايشين علشان يحققوه بجد هتزعل اوى والعيب مش عليهم هم اتولدوا ولقوا ان اهاليهم دخلتهم المدرسه فكملوا فيها للاخر ونجحوا
فلقوا انهم لازم يكملوا طريق الكفاح فدخلوا الجامعة ونجحوا واتخرجوا انت عايز منهم ايه تانى ؟ اللى عليهم عملوه
هنيجى بقى للسؤال اللى اجابته مترضيش حد
طب لما هم اتعلموا وعملوا اللى عليهم ليه بقوا كده دماغهم واقفة وصدت من قلة التشغيل؟
الرد انهم متعلموش اذاى يشغلوا دماغهم ويعرفوا يحققوا ذاتهم يعنى لما الطفل يدخل الحضانة ويطلع اول سلم
فى عمارة التعليم اللى وقعت من زمان وميخرجش منها غير بعد حوالى 20 سنه وفى ال20 سنة ديه مستفادش
اى حاجة بالعكس ضيع وقته وفلوسه على الفاضى ودرس حاجات معظمها غلط ومش حقيقية يعنى انت مبتعملش
حاجة غير انك بتضع ثقافة غلط فى الجيل اللى انت متحكم فيه وفى دماغه اللى بتقيدها بمعرفة حاجات معينة وبتكتبله المناهج بطريقة تخليه عاوز يحفظ علشان يرص الكلام ده فى الامتحان ويطلع من الامتحان فاقد الذاكرة
انت مستنى ايه من جيل اتعلم بالطريقة ديه .............
03/03/2008
عقول خربانة
الاشتراك في:
تعليقات الرسالة (Atom)
هناك 27 تعليقًا:
بوست رائع يمس الواقع ويتلازم معه - أحب أقولك لو على الجامعات , مثلا فالكلية بتاعتى حوالى 40% من المواد اللى بتتدرس ليس لها اى صلة بالمجال و20% من المواد جزء بسيط منها يمس المجال , أما الباقى فهى المفروض انها مواد ليها دعوة بالمجال بس الفرق إنها بتشرح غطا الحلة بس وعليك انت بقى لما تتخرج تعرف الحلة واللى فيها من سوق العمل - البلد دى الغلط فيها مليان والصح فيها مستخبى
بوستك رائع واصلى التقدم واتحفينا
تحياتى لك ولقلمك المنفرد
محمود
احنا مش فالحين غير اننا نقول
البانجو مش بتاعى
و الله برىء يا بية
تحياتى
منتظرين من الجيل دا انه يتحمل عصر من البطالة وارتفاع الأسعار اللي خلا الشباب مش عارف حتي يعيش نفسه علشان يقدر يتجوز واحدة يعيشها معاه .
مستنين منه انه يصمد امام كل المغريات اللي جاية لنا من العالم كله ويتمسك بقيمه ومبادئه وأخلاقه والحاجات اللي هو اساسا ما اتعلمهاش في المدارس وما لقاش حد فاضي يعلمهاله في البيت .. مستنين منه انه يفضل مبتسم ولا يستسلم للاكتئاب اللي هيجيله بعد ما يكتشف انه ضيع سنين من عمره علي ولا حاجة وانه اسم الجامعه اللي اتخرج منها حتي غير معترف بيه .. مستنين منه انه يقف رجل امام الاحباط واليأس اللي هيوصل بيه بعد ما كاان من اذكي زملائه بقي اغباهم وانه كل احلامه اتلخصت في انه يسافر ويسيب البلد يمكن ساعتها يلاقي حد يسمعه ويهتم بيه ويمكن ساعتها يلاقي جزاء علي قد تعبه ويمكن ساعتها يحس انه بني ادم وليه حقوق زي ما عليه واجبات..
شوفتي بقي احنا مستنين منهم ايه
معلش انا اسفه علي كلامي الكتير بس موضوعك فجر جوايا حاجات باحاول ما افكرش فيها علشان ما يجيليش اكتئاب بدري..
وميرسي علي زيارتك الرقيقة لمدونتي وتقبلي مروري
الله ينور عليكى
التعليم بيخرج جهلاء يحملون شهاده جهلهم
حتى لما حبوا يطوروا شويه عملوا التعليم الصناعى وتطويره وعملوا اشى مبارك كول واشى مش عارف ايه
طلع جيل من الصنعيه اه الى دخلوا مدارس لكن الى اتعلموا الصنعه من الاول الى هما بليه اشطر منهم
وفى الاخر اصبحوا يتعاطوا مخدرات زى اغلب الصناعيه نظرا لدخلهم الكبير
الدخل الكبير بتعهم بينصرف فى الافراح وعلى المخدرات وعلى الديسكوهات
الى بقولوا ده من اغلبيه الفئه دى
الى بتفكر فى يومها فقط
ولما حد منهم يصيبه اى حادثه يلف حولين نفسه وعلى التامين الصحى
لانه ماكنش عارف انه بكره جاى
موضوعك جميل جدا
تحياتى
على رايك مستنين ايه من جيل اتعود ان ماما وبابا بيدولوه مصروف واتعود ان بابا بيشترى له لبس وماما بتاكله بيدخل الامتحان يكتب الكلمتين اللى حافظهم وبعد ما يخرج بيقطع الكتاب اهى ماده وخلص منها ده اذا كان عنده ليها كتاب اصلا يبقى ازاى شخصية هلامية كدا هتفكر تبنى نفسها وتكون مستقبلها مش بتريق والله فى ناس كتير اوى كدا علشان مش اعمم فى ناس عندها هدف وبتنحت فى الصخر علشان توصله
تحياتى
kalamek kolo sa7 mafesh ay commenT... bas yareet netkalem wn2oool ......weba3eeeeen.....
thank'
HOSSAM HAMED
mahmoud
انا عايزة اقول لك يا محمود ان بجد المناهج التعليمية عندنا سواء اللى بتتدرس فى المدارس او اللى فى الجامعات كلها مالهاش لازمة وعلشان كدةالطالب لو ربنا اكرمه ولقه وظيفة فى مجال دراسته بيلاقى نفسه مش فاهم حاجة ومافيش اى علاقة بين اللى كان بيدرسه وبين اللى لاقاه فى شغله
وشكرا على تعليقك
kafrawy
على رايك انا لو من وزارة التربية والتعليم اخلى البانجو جزء من المنهج
منها الطلبة تنجح ومنها انه حاجة هتنفعهم قدام
تحياتى
سنووايت
والله انا حتى مش شايفة ان السفر حل لان دلوقتى اللى بيسافر بيبقى خارج من البلد وهو كارهها ومش طايق يقعد فيها ولما يسافر ويشتغل ويترستق بيبقى مش عايز يرجع تانى وعاوز يكمل فى البلد اللى هو فيها ولو رجع هيرجع قرفان من البلد واللى فيها
كده احنا مش بنحل المشكلة الحل ان التعليم يتغير ويطلع جيل مصرى عارف على الاقل هو عايش ليه
شكرا ليكى
momken
اولا انا بشكرك على تعليقك الجميل
وفعلا اللى انت بتقوله ده مهم اوى
لانهم حتى لما عملوا مدارس فنيه فشلوا
يعنى المفروض ان يبقى فى فرق بين الصنايعى المتعلم وبين بلية واللى اتعلم ده المفروض انه اتعلم ان بكره جاى مش عايش بالبركة كده
ويارب دايما اشوف تعليقك
desert cat
والله انت معاكى حق فى ان التربية كمان بقت غلط و مبقاش فى اعتماد على النفس بس حتى لو التربية اتصلحت مش هتجيب نتيجة من غير تعليم لازم طريقة التربية وطريقة التعليم تتصلح
شكرا على متابعتك
hossam hamed
ماتستعجلش على كلمة وبعدين هتيجى هتيجى
على فكرة اللى احنا فيه ده مجرد مرحلة احنا دلوقتى بندور على المشكلة وبنحاول نلاقى لها حل المراحل اللى بعد كده هتيجى وهنبقى احسن وانا عن نفسى مبسوطة ان احنا وصلنا لمرحلة الكلام ده فى حد ذاته انجاز كبير
وخليك متفائل
فكرتينى بالقرارات اللى تحرق الدم وتحير الطلبة والاهالى كمان فاكراها طبعا شيلوا سنة ستة ابتدائى عشان كده كتير عليهم وبعديها بكام سنة رجعوها عشان يسفيدوا من الانشطة قال يعنى فيه تنمية مواهب والتحسين فى الثانوية العامة وبرضه شالوها وفى الاخر ان الثانوية العامة بدل ماكانت هتقرف الطلبة والاهالى سنتين لا بقوا تلاتة تفتكرى الخطة دى مرسومة عشان الطلبة يا اما تكرةه التعليم يا اما مايصدقوا يخلصوا ويتعلموا اللى هما عايزينه بطريقتهم
ضغطى على الجرح بس احييكى
والله كل واحد بيحط همه على هم غيره تطلع بلوة كبيرة إسمها الوطن العربي
مش عارفين نعمل فيه إيه؟
أنا النهاردة أول مرة أشوف أوبريت الضمير العربي
استغربت أوي من كلمة ضمير دي
وبعدين العربي دي بتفكرني بكلمة تانية إسمها العروبة
والعروبة بتفكرني بقصيدة لأحمد مطر إسمها إلحاح بتقول:
- ماتهمتي؟
- تهمتك العروبة
- قلت لكم ما تهمتي؟
- قلنا لك العروبة
- يا ناس قولوا غيرها ..
أسألكم عن تهمتي..
ليس عن العقوبة!
وتحياتي
عندك حق فى كل كلمه قولتيها
بس هنعمل ايه احنا اتعلمنا كدا واللى قبلنا كانو كدا واللى قبلهم كانو كدا وهيجى ناس بعدنا برضو هيبقو كدا
عارفه ليه ؟؟
لان البلد ماسكها ناس مش عايزانا نفكر ولا نشتغل صح ولا نعرف ايه اللى لينا ونعرف بس ايه اللى علينا
فمش يهمهم ان حد يتعلم صح علشان ميجيش يقول ده صح وده غلط
ونفضل نلف فى الدوامه اللى هما عملوهالنا من غير مانحس
دى بكل بساطه سياسه بلد وعلشان نغيرها عايزين نغير نفسنا ونقدر ندافع عن حقوقنا اللى ضاعت من زمان
ياريت جات على كدة بس عارفه بجد والبيحصل مهزله واللشفتو مكنش شويه مش عايزة اقولك اننا بنشارك بنظمنا الفاشل مع كل دول فى تدمير جيل كامل
monaliza
انا رايى ان الخطة ديه اتعملت علشان كذه حاجة وكلها بتتعارض مع مصلحة الطالب والاهالى يعنى لما بيزودوا سنة طبعا السنة ديه ليها مصاريف بتتدفع للمدرسة غير طبعا مصاريف الدروس وطبعا مصاريف الكتب الخارجية وغيره وغيره وياريت ده بفايدة
شكرا على تعليقك
الاستاذ
والله انا شايفة ان الوطن العربى كله مدى لضميره اجازة وادينا كلنا اتفرجنا على اغنية الضمير العربى وعلى فكرة كانت قاسية اوى بس وبعدين كلنا اتفرجنا وقلنا يا حرام وقلبنا القناة وكملنا حياتنا عادى جدا يعنى لما الاغنية كلها بتقول ان العرب اخوة وبعدها بشوية تسمع الاغنية اللى السعودية شاتمة فيها مصر وبعدين تسمع الاغنية اللى مصر ردة فيها وبرده شاتمة اخوة مين بقة وحتى احنا كمصرييين وشعب واحد معندناش ضمير لما بنتعامل مع بعض والا ده مكانش هيبقى حالنا ولا كان التعليم هيبقى كده
شكرا ليك
di el2mr
فعلا التعليم هو الحاجة الواحيدة اللى هتخلينا نغير من شعبنا ولو فعلا عايزين نبقى احسن لازم نخلى التعليم عندنا يطلع عقول فاهمة ومش خربانة
تحياتى
ma2tshren
والله انا التعليم بالنسبة لى عذاب واحنا اتدمرنا بما فيه الكفاية والاجيال اللى بعدينا لو ملحقناهاش هتدمر هى كمان ونبقى كده متعلمناش من اللى حصل لنا
وشكرا لتعليقك
اولا انتى عندك حق ان نظام التعليم فى مصر منيل ومقندل بست النيله
بس بصراحه مش كله يعنى
انا عن نفسى اتفدت شويه من ايام المدرسه فى حاجه
وفى الكليه بردة بجد ظبطت دماغى كتييييييييير عن الاول
فانا بيتهيالى ان فى جزء من الغلط بردة على الانسان نفسه انه مستسلم للنظام الرزل دا مش بيدور لنفسه على حجات تنميها
مش كل نرميها على غيرنا
يعنى مثلا لو انتى عايزة تتعلمى السباحه مش هتستنى ان المدرسه تبنيلك بسين وتجبلك كوتش يدربك ع السباحه
انتى اللى هتدورى وهتتعلمى
نفس النظام بردة فى التعليم
وانا معاكى ان حل من الحلول اننا بدأنا نتكلم مع بعض واكيد خنوصل مع بعض فى الاخر لنتيجه
يا جماعه احنا عمالين ننتقض التعليم عندنا فى مصر ومش عاجبنا طيب فى حد من إلى علق على الموضوع ده سافر بره شاف التعليم بره شكله ايه التعليم بره مش اسهل من عندنا بالعكس ده اصعب كتير وله اشكال كتير طب ده احنا اسهل والله احنا على الأقل بنعتمد فى التعليم عندنا على الكتب إلى بناخدها بس بره بقي مش كده التعليم برة بيعتمد على الثقافه الفكرية اكتر يعني بمعني اخر الطالب من دول بيعتمد على المكتبه والكتب والبحوث الخارجية يعني هو إلى بيدور على إلحاجة إلى عاوز يعرفها ويفهمها ولكن احنا بتجيلنا الكتب لغاية عندنا وذاكر إلى فى الكتاب علشان الامتحان جاى منه
الغلط هو الاهمال و عدم الأحساس بالمسؤلية
يمكن ؟؟؟
لكن الأكيد ان كل واحد مننا المفروض يشتغل على نفسه صح مش يستنى الحكومة و الكلام ده
تحياتى
lonlysmily
والله انا لو عايزة اتعلم السباحة هجيب عوامه وانزل البحر
بس لو عايزة اتعلم الهندسة ولا الطب ولا الصيدله
مفيش قدامى إلا الجامعة او الكليات الخاصة اللى مصاريفها ذى ما انتى عارفة يبقى الموضوع محتاج وقفة ووقفه جامدة ذى بتاعت عوكل
ولا انتى شايفة ايه
تحياتى
رحاب
بصى ياستى اولا الطلاب اللى عندنا متعودوش انهم يدوروا فى الابحاث والكلام ده والمكاتب محدش بيزورها اساسا ده حتى الكتب اللى انتى بتقولى انها بتريحهم مش قادرين يذاكروها لوحدهم وبيخدوا دروس خصوصية وعلى فكرة طريقة التعليم هى اللى بتنمى فى الانسان حب انه يبقى مثقف
تحياتى
تمر حنة
والله انت كلامك مظبوط بس برده الحكومة عليها دور كبير المفروض انها تقوم بيه احنا لوحدنا منقدرش نعمل انجاز
وشكرا ليكى
mafesh mawdoo3 gded wala eh ana mestane..3ala fekra el blog gamed we haykon min aham el blog's ele mawgoda zay 7adoota ..bas ektebe mawade3 keter we fe nafs el mostawa....rabena yewafa2ek
thank's
إرسال تعليق